Ислами терминдер

Лағынет – қарғыс.

Лағынет шақыру (лиған) – ер мен әйелдің өзара лағынет шақыруы. Егер ері әйелін ойнастықта айыптап, оны дәлелдей алмаса, ал әйелі оны жала жауып тұр деп айыптаса, олар «Нұр» сүресінің 6-9-аяттарында келген Алла тағаланың бұйрығына сәйкес бір-біріне лағынет шақыруы тиіс. Бұдан кейін ол екеуі біржолата ажырасады, бірақ әйелі күйеуіне мәһрді (қалыңмал) қайтаруға міндетті емес. Сонымен қатар ажырасқаннан кейін туылған перзентті күйеуі «менікі емес» деуге құқылы.

Лақат (лахад, ләхд) – қабір қазғанда, мәйтті жатқызатын қабірдің бүйірінен кәулеп жасалған орын.

Лақит – тастанды. Әке-шешесінің, тегінің кім екендігі белгісіз тастанды бала. Ислам шариғатында мұндай сәбилердің жауапкершілігі мемлекетке жүктеледі. Егер осындай тастанды баланың артында дүние-мүлік қалатын болса және оның ешқандай мұрагері болмаса, оның дүние-мүлкі мемлекеттің қазынасына өткізіледі.

Лат – мүшрік араб тайпалары сиынған әйел бейнесіндегі құдай.

Лә иләһә иллАлла – Алладан басқа ешбір құдай жоқ.

Ләббәй – мен құзырыңдамын, сені тыңдап тұрмын деген сөз.

Ләйләту әл-жамғ – қажылық маусымы кезіндегі зул-хижжа айының оныншы түні.

Ләйләту әл-қадр (ләйләтул-қадр) – қадір түні. Қара: қадір түні.

Ләух Махфуз (Ләухул-Махфуз) – Сақтаулы Тақта. Алла тағала бүкіл жаратылған нәрселердің тағдырын жазып қойған көктегі сақтаулы кітап.

Лиған – қара: лағынет шақыру.

Лизәм – күнә үшін берілер жаза белгілі бір уақытқа дейін кешеуілдейтінін, олай болмаған жағдайда жаза сол заматта түсерін білдіреді. «Таһа» сүресінің 129-аятын қараңыз.

Лимәс – анықтап қарап және жақсылап тексермей, ұстап көріп қана сауда-саттық жасау.

Луқата – тауып алған зат. Шариғат заңы бойынша, егер тауып алған заттың егесі табылмаса, бір жылға дейін сақтау керек және осы аралықта өзінің бір затты тауып алғандығын жариялап жүруі тиіс. Содан кейін ғана тауып алған адамға оны жаратуына болады.