Зекет кімге парыз?

Сұрақ: Зекет кімге парыз?

Жауап: 

Зекет кімге парыз?

 С: Зекет кімге парыз болады?

Ж: Зекет – дүние-мүліктің зекет беретін мөлшеріне (нисабқа) толық ие әрі ие болғанына бір жыл өткен балиғат жасындағы ақыл-есі түзу, азат мұсылманға парыз.

С: Мал-мүліктің зекет беретін мөлшері қандай?

Ж: Күмістен екі жүз дирхем (595г.), алтыннан жиырма мысқал (85г.) немесе осы бағадағы айналымды ақша не тауарға ие болу.

С: Осы мөлшерде мүлікке ие, бірақ қарызы бар адам зекет бере ме?

Ж: Мұнда мына нәрселерге назар аударылады. Егер қарызы бүкіл мал-мүлкінің мөлшеріндей көп болса зекет бермейді. Ал, егер қарызы аз болып, сол қарызын шегеріп тастағанда қалған мал-мүлкі зекет беретін мөлшерге жетсе зекет шығарады.

С: Сауда-саттық тауарынан зекет бере ме?

Ж: Иә, егер сауда-саттық жасап жүрген мал-мүлкі екі жүз дирхем күміске немесе жиырма мысқал алтынға пара-пар болса зекет беру парыз.

С: Бір жыл өту керек дегеннің мағынасы не?

Ж: Оның мағынасы егер балиғатқа жеткен азат мұсылманның зекет беретіндей мөлшердегі дүние-мүлікке ие болғанына ай күнтізбесімен есептегенде бір жыл өткен болса, оған зекет шығару парыз.

С: Тұрғын үй, киім-кешек, үй жиһаздары туралы не айтасыз?

Ж: Тұрғын үй, киер киім, үй жиһаздары, мініс көліктер, құрал-жабдықтардан зекет берілмейді. Өйткені бұлар жеке адам тіршілігіне қажетті зәру дүниелерге жатады.

С: Ал, егер осы аталған нәрселермен сауда жасайтын болса зекет беріле ме?

Ж: Иә, егер зекет беретін санға жетсе зекетін шығару парыз.

С: Алтын-күміс немесе тауарлардың зекетін ақшамен шығарса бола ма?

Ж: Иә, зекетті ақшалай түрде шығаруға болады.

С: Егер бір кісі иелігіндегі бүкіл мал-мүлкін зекет беруді ниеттенбей, Алла жолында садақа ретінде таратқан болса үкімі қандай?

Ж: Оның мойнынан зекет беру түседі.

С: Зекет уәжіп болған соң банкротқа ұшырап кедейленсе не болады?

Ж: Егер бүкіл мүлкі жойылса зекет парыз болмайды. Ал, егер мүлкінің кейбір бөлігі жойылып, қалған бөлігі зекет беруге жетсе, зекет береді. Мал-мүлкін өзі пайдаланып азайтқан болса зекетін береді.