РАМАЗАН АЙЫНЫҢ СӘРЕСІН ІШУ МІНДЕТ ПЕ?

 

Сәресі ішу – оразаға ниет еткен адамның таң атар алдында тамақтануды немесе ең болмағанда  су ішуді білдіреді. Үкімі – мұстахаб (істесе сауап, ал орындамаса күна сналмайтын іс) амал[1]. Бұған ешкімнің дауы жоқ. Әнәс бин Мәлик (оған Алла разы болсын) жеткізген хадисте Пайғамбарымыз (оған Алланың салауаты мен сәлемі болсын) былай деген:

تَسَحَّرُوا فَإِنَّ فِي السَّحُورِ بَرَكَةً

«Сәресіге тұрыңдар, сәресіде берекет бар» [2].  

Тағы бір хадисте: 

فَصْلُ ما بيْنَ صِيَامِنَا وَصِيَامِ أَهْلِ الكِتَابِ، أَكْلَةُ السَّحَرِ.

«Біздің ораза мен кітап иелерінің оразасының айырмашылығы сәресі ішуде»[3], – делінген.

    Сәресі уақыты түннің соңғы алтыншы бөлігінен таң намазының уақыты кіргенге дейін жалғасады[4]. Таң намазының уақыты кіргенде сәресі ішуді тоқтату тиіс. Сәресі ішудің өзіндік берекеті мен артықшылықтары бар. Атап айтқанда:

1. Сәресін ішуге тұрған адамға Алла мен Оның періштелері салауат айтады;

2. Пайғамбарымыздың (оған Алланың игілігі мен сәлемі болсын) сүннеті орындалады;

3. Құлшылыққа күш-қуат береді;

4. Ширақтықты арттырады (белсенділік, энергия, т.б);

5. Аштықтан келетін нашар мінездің алдын алады;

6. Сəресі дұғаның ең қабыл болатын кезіне сәйкес келеді;

7. Сəресіде ниетті түзеп, ықыласты арттыруға мүмкіндік туады;

8. Сәресіне тұрған адам таң намазына ұйықтап қалмайды[5].

Сондықтан мұндай пайдадан құр қалмас үшін сәресіне тұрған жақсы. Ал сәресі іше алмай қалған адамның оразасы дұрыс саналады. 

 

 

             Елбек Тасболатұлы

Павлодар облысы бойынша пәтуаға жауапты имам