ҚАДІР ТҮНІ ҰЙЫҚТАМАУ ШАРТ ПА?

 

Қадір түні – қасиетті, құдіретті, мөлшем, тағдыр деген мағыналарды білдіреді. Бұл түннің артықшылығы жөнінде Алла Тағала Құранда былай дейді:

لَيْلَةُ الْقَدْرِ خَيْرٌ مِّنْ أَلْفِ شَهْرٍ

«Қадыр түні мың айдан да  қайырлы»[1].

Пайғамбарымыз (оған Алланың салауаты мен сәлемі болсын):

مَن قَامَ لَيْلَةَ القَدْرِ إيمَانًا واحْتِسَابًا، غُفِرَ له ما تَقَدَّمَ مِن ذَنْبِهِ

«Кім Қадір түнін иманмен және сауап тілеп, (намазда) тұрумен өткізсе, өткен күнәлары кешіріледі»[2], - дейді.

Имам Мужаһид: «Қадір түнінде жасалған амал (намаз, құран оқу, садақа беру) мың айдың ішінде жасалған амалдан хайырлы»[3] - десе, Хафиз Ибн Ражаб: «Қадір түнін жіберіп алғандарымды қайта толықтыру үшін қолданамын, өйткені бұл түн тұтас өмірге тең келеді ғой!»[4], - деген. Ал,  Суфиян Сәури былай дейді: «Қадір түні тілек тілеп, кешірім тілеу намаздан ұнамды. Құран оқып, артынан тілек тілеу – ең жарасымдысы» [5].

Ендеше қадір түнін барынша құлшылықпен өткізген дұрыс. Бірақ ұйықтамай өткізу шарт емес. Себебі Айша анамыз:

ولا قام ليلة حتى أصبح

«(Алла Елшісі) таң атқанша түнді (барлық бөлігін) намазбен өткізген емес»[6], - дейді.

Алайда Пайғамбарымыздың (оған Алланың салауаты мен сәлемі болсын) тағы бір хадисінде:

إن هذا الشهر قد حضركم ، وفيه ليلة خير من ألف شهر ، من حرمها فقد حرم الخير كله ، ولا يحرم خيرها إلا محروم

«Сендерге мына ай келді. Бұл айда мың айдан артық түн бар. Кімде-кім осы түннің жақсылығынан мақұрым қалса, жақсылық атауынан құр қалғаны. Оның жақсылығынан тек қана нағыз мақұрым адам ғана құр қалады»[7] - делінген.

Сондықтан мұсылман адам барынша осы түнді құлшылықпен өткізіп, сауаптан құр қалмауға тырысуы қажет. Ал шаршап-шалдықса кішкене тынығып алудың оқасы жоқ.

 

 

 Исенов Еркебұлан Олжабайұлы

Ақмола облысы Ерейментау ауданданық

 «Тоқан Хазер» мешітінің бас имамы