Ғұламалар кеңесі туралы
Е Р Е Ж Е
1. Жалпы ережелер
1. Ғұламалар кеңесі (бұдан әрі - Кеңес) Қазақстан мұсылмандары діни басқармасы (бұдан әрі - ҚМДБ) жанындағы діни-ғылыми мәселелерді шешумен айналысатын консультативтік-кеңесші орган болып табылады.
1.2. Кеңес өзінің қызметінде Құран Кәрімді, Пайғамбар хадисін, сүнниттік бағыттағы Әбу Ханифа мазһабы және имам Матуриди ақидасы ілімін, Қазақтан Республикасының Конституциясын, Заңдарын, ҚМДБ Жарғысын, сондай-ақ осы Ережені басшылыққа алады.
1.3. Кеңес өзінің қызметін ҚМДБ-мен, өзге де қоғамдық және халықаралық ұйымдармен өзара қатынаста жүзеге асырады.
1.4. Кеңестің шешімдері ұсыныстық сипатқа ие.
2. Кеңестің мақсаты
2.1. Ислам негіздеріне сүйене отырып, қоғам өмірінде мұсылмандық ұстанымға қатысты туындап отырған өзекті мәселелерде пәтуалар шығарып береді. ҚМДБ-ның жалпы қызметі жүйесі және оның имамдары қызметінің негізгі бағыттарын зерттейді. Уағыз тақырыптары мен жұма уағыздары мәтіндерін бекітеді.
2.2. ҚМДБ жанындағы имамдардың біліктілігін арттыру институты, Жоғары оқу орындары, ҚМДБ медреселері мен мешіттер жанындағы сауат ашу курстарының бағдарламаларын жетілдіруге ұсыныстар енгізеді.
2.3. ҚМДБ имамдарына мұсылмандықтың дәстүрлі жолы бойынша мақсатты түсініктемелер береді.
2.3. Исламды теріс жағынан көрсететін, теріс идеялардың, діни фанатизмді уағыздайтын аудио, бейне және баспа материалдардың таралуына тосқауыл қою шараларын қабылдайды.
3. Кеңестің міндеттері
3.1 Исламның негіздерін, шариғаттың ережелерін бұрмалауға, дінаралық араздыққа, мемлекеттік органдар мен діни бірлестіктер арасындағы қақтығысқа, ұлтаралық кикілжіңдерге алып келетін пікірлер және шақырулардың орын алмауы мақсатында елдегі мұсылмандық ұстаным жағдайына алдын ала талдау жасап, ұсыныстар енгізу.
3.2. Ислам мәселелері мен діни тақырыптарға арналған кітаптарға, аудио-бейне материалдарға жасалған сараптамаларды қарау және бекіту.
3.3. Қазақстан мұсылмандарына ақпараттық және кеңестік көмек беру.
3.4. ҚМДБ мәселелері бойынша пікір білдіретін идеологтардың құрамын бекітеді, оның жұмысының бағыттарына талдау жасау.
3.5. Мұсылман жамағатының қажеттілігіне байланысты елді мекендерде салынатын мешіттер бойынша пікір білдіру.
3.6. Мұсылмандардың діни жораларының бірізділікке түсірілуі мәселелеріне талдау жасау және ұсыныстар енгізу.
3.7. ҚМДБ-ның басқа діндер мен конфессиялардың өкілдерімен қарым-қатынасының бағыттарына талдау жасау.
3.8. ҚМДБ-ның мемлекеттік органдармен ынтымақтастығының бағыттарын жүйелендіру жұмыстарын жүргізу.
3.9. Мұсылмандардың ішіндегі ахуалдың дамуының негізгі үрдістерін қадағалап, ұсыныстар дайындау.
3.10. Қазақстан мұсылмандары діни басқармасы мен оның дін қызметкерлеріне тұрғындардың сенімін қалыптастыруға ықпал жасау.
3.11. Дәстүрлі исламның танымалдылығын арттыру тетіктерін әзірлеу.
3.12. Кеңес ҚМДБ қызметінің ұйымдастырылуы және атқарылуы туралы ҚМДБ Бас мүфтиі мен Төралқаны хабардар ету.
3.13. Шет мемлекеттердің мұсылмандық тиісті ұйымдарымен халықаралық байланыстарды жолға қою.
3.14. ҚМДБ Жарғысымен жүктелген өзге де функцияларды жүзеге асыру.
4. Кеңес қызметін ұйымдастыру тәртібі
4.1. Кеңесті Қазақстан мұсылмандары діни басқармасының төрағасы басқарады.
4.2. Кеңестің мәжілістері кемінде үш айда бір рет өткізіледі. Кеңестің кезектен тыс мәжілісі Кеңес төрағасының жеке бастамасы бойынша немесе Кеңес мүшелерінің жалпы санының кемінде үштен бірінің өтініші бойынша шақырылады.
4.3. Кеңес мәжілісі, егер оның жұмысына Кеңес мүшелерінің жалпы санының кемінде үштен екісі қатысуымен заңды болып есептеледі. Кеңестің шешімдері мәжіліске қатысқан Кеңес мүшелері жалпы санының көпшілік дауысымен қабылданады.
4.4. Мәселелерді пысықтау, мәжілістерді дайындау, сараптау және таңдау жұмыстарын жүргізу үшін Кеңес өз мүшелерінің бірінің жетекшілігімен іс-қимыл жасайтын жұмыс топтарын құра алады.
4.5. Кеңес өзіне жүктелген міндеттерді жүзеге асыру үшін заңнамада белгіленген тәртіппен мыналарға:
1) Мемлекеттік органдардан, діни ұйымдар мен жеке адамдардан өз құзіретіне жататын мәселелер бойынша қажетті ақпарат сұратуға;
2) Орталық және жергілікті мемлекеттік органдардың ақпараттық деректер банкін пайдалануға;
3) Кеңес өз құзіретіндегі мәселелерге қатысты нормативтік құқықтық кесімдер жобаларын әзірлеуге қатысуға;
4) Кеңес құзіретіне қатысты мәселелер бойынша ресми түсініктемелер беруге;
5) Заңнамаға сәйкес өзге де өкілеттіктерді жүзеге асыруға құқылы.
5. Кеңестің құрамының қызметі
5.1. Кеңестің Төрағасы мен орынбасарлары, хатшысы Кеңес мәжілісінде бекітіледі.
5.2. Төраға болмай қалған жағдайларда оның функцияларын төраға орынбасары атқарады.
5.3. Кеңестің құрамы Қазақстан мұсылмандары діни басқармасы қызметкерлері, ғалымдар мен белгілі исламтанушы және теологтар қатарынан жасақталады.
5.4. Кеңеске мүшелікке қабылдау және шығару туралы шешім Кеңестің мәжілісінде қабылданады.
5.5. Кеңес мүшелері өз міндеттерін қоғамдық негізінде жүзеге асырады және осы жұмыстары үшін қандай да бір жалақы алмайды.
ҚАЗАҚСТАН МҰСЫЛМАНДАРЫ ДІНИ БАСҚАРМАСЫ ЖАНЫНАН ҚҰРЫЛҒАН ҒҰЛАМАЛАР КЕҢЕСІ МҮШЕЛЕРІ
1. Наурызбай Тағанұлы ӨТПЕНОВ – ҚМДБ төрағасы, Бас мүфти
2. Ершат Ағыбайұлы ОҢҒАРОВ – PhD докторы, ҚМДБ наиб мүфтиі, Ғұламалар кеңесінің төраға орынбасары
3. Ғылымбек Жәдігерұлы МӘЖИЕВ – PhD докторант, ҚМДБ-ның Аппарат басшысы
4. Мухаммад-Хусайн Усманұлы АЛСАБЕКОВ – профессор, филология ғ.д., Бас мүфтидің кеңесшісі
5. Қайрат Құрманбаев – PhD докторы, Нұр-Мубарак Египет ислам мәдениеті университетінің проректоры
6. Ержан қажы Малғажыұлы – Нұр-Мубарак Египет ислам мәдениеті университеті ректорының кеңесшісі
7. Серікбай қажы Сатыбалдыұлы ОРАЗ – Республикалық имамдардың білімін жетілдіру ислам институтының директоры
8. Шамшәдин Тұрсынұлы КЕРІМ – профессор, филология ғ.д., Нұр-Мубарак Египет ислам мәдениеті университеті «Әбу Ханифа» орталығының директоры
9. Сансызбай Құрбанұлы ШОҚАНОВ – PhD докторант, ҚМДБ Шариғат және пәтуа бөлімінің меңгерушісі, исламтанушы
10. Алау Шайқымұлы ӘДІЛБАЕВ – доцент, PhD докторы, Нұр-Мубарак Египет ислам мәдениеті университетінің оқытушысы
11. Мұхиддин Исаұлы ПАТТЕЕВ – PhD докторы, Нұр-Мубарак Египет ислам мәдениеті университетінің оқытушысы
12. Смайыл Сүйерқұлұлы СЕЙТБЕКОВ – философия ғ.к., ҚМДБ Халал өнімдерін стандарттау бөлімінің меңгерушісі
13. Батыржан Берденұлы МАНСУРОВ – PhD докторы, ҚМДБ Уағыз-насихат бөлімінің меңгерушісі
14. Мұхан ИСАХАН – PhD докторы, исламтанушы
15. Ерсін Бекайдарұлы ӘМІРЕ – PhD докторант, Алматы орталық мешітінің наиб имамы
16. Бауыржан Алиұлы – PhD докторант, Нұр-Мубарак Египет ислам мәдениеті университетінің оқытушысы